1994

張國榮坐在山頂上評黎明

 1994-01-21

文：林冰

一月十七日(星期一)，也就是無線的十大勁歌金曲頒獎禮的翌日，我到山頂道去探班，探望高志森一組人拍東方賀歲片《大富之家》。係嗰度，我見到張國榮，以下係我與張國榮的談話。

張：冰姐，你開心啦，你個「仔」得了最受歡迎男歌星獎咯。

林：我個「仔」？唔係我想要嘅「仔」㗎，係人哋俾我嘅。有個咁靚嘅「仔」派，都要欣然接受嘅。(我諗你哋知我地講緊嗰個係黎明呀)。

張：好呀，俾咗呢個獎佢，令佢以後更有信心。有D人係需要鼓勵嘅，越讚佢，越做得好，黎明係呢種人。

林：榮少呀，你點解咁惜黎明？

張：我個個都惜。不過，好多年前，我地見過一面，我對佢講了一番說話，佢緊緊記住 ……

林：嗰次係响何鴻燊屋企吃飯？

黎明大騷孤立常獨在廁所中

張：唔記得啦。但，佢成日都記住。冰姐呀，你要「射」住佢呀，佢好好人㗎，但，佢好孤立。

林：榮少，你話我知，佢點會被孤立㗎？佢同佢地傾唔埋咩？係佢自己思想與他人截然不同定點呀？

張：我諗佢有少少鑽牛角尖。但佢係一個好人。

林：辣士里，張學友都係好人呀，劉德華都係好人啫，佢地個個都努力向上，作風正派，唔會故意製造黎明孤立噃？！

張：我諗最主要係彼此唔溝通。佢地講笑，佢唔明佢地，唔識笑。佢講笑，佢地又唔明佢，又唔識笑，整整吓，佢有佢自己，人哋有人哋。

林：真係？

張：有一樣嘢，我唔講你唔知，每次做一騷，黎明都一個人 匿埋去廁所坐，點啫？咁多人喺度，大家無得傾。佢唔合群唔埋堆，我以前都唔埋堆㗎，點啫？但我照樣坐喺度，做大騷時，我指定要獨立化妝間，我鍾意喺邊度就 喺邊度坐，駛乜避人啫，我有同黎明講，叫佢唔使避開人，自己匿埋在廁所，好慘啫。

林：因為你知佢孤立，你特別關懷佢？

張：可以咁講。我係覺得佢孤立，特別關懷佢。

唱歌好似演戲 開竅就入得易

林：辣斯里，你覺得黎明唱成點？

張：佢聲底好。有前途。冰姐你知㗎，唱歌同拍戲一樣，需要日子磨煉。有一日，佢一旦開竅，捉到個感覺，就會好快「入」，唱得好好，尋晚，勁歌金曲你有睇呀？覺得我係唔係對黎明好好？

林：你出場充滿自信……

 

張：梗係啦，完全唔關我事，毫無壓力。

林：你同黎明講嘢時，似個教授，佢似足你學生。

張：覺唔覺到我對佢關懷？

林：覺得，如果唔係因為黎明欣然接受，你無可能係百多萬觀眾面前扮師父㗎。

張：佢係當我師父呀。

林：辣士里，你事前係唔係知佢會得勁歌金曲最受歡迎男歌星獎呀？

張：唔知，只知我頒呢個獎啫。邊個得，我完全唔知，所以，我要否認話我講過關於希望佢得呢個獎(指最受歡迎男歌星獎)，費時啦，真係佢得嘅，D人以為造馬，所以我要澄清……好公平。最受歡迎男歌星，佢有幾千歌迷，唔係最受歡迎咩？

公司養六個人單係服侍黎明

林：聽說依加嘅歌迷會，有人力、財力，不是等閑人可以支撐的，就係黎明，單係經理人公司，只做佢一個人嘅嘢，淨係做黎明一個人嘅嘢，公司養住六個人，李進重話要招兵買馬，支出奇大，皮費奇重。

張：依加D歌星賺錢多過我地舊時好多，劉德華歌迷會連會址都有添。

林：黎明話只靠演唱會咋。

張：上大陸登台，山大斬埋有柴，如果繼續開放，好大條財路㗎。

林：講吓你自己啦，你今年點呀？
 

張：拍埋呢部賀歲片(指《大富之家》)，廿幾號啦，我返加拿大過年。住到有工作至返來。

明夏開拍《花影》陳凱歌作導演

林：陳可辛嗰度點呀？

張：我同陳可辛傾了兩個劇本。睇吓點，我話唔使一定要開，劇本好，開，明年三月至五月如果得，就拍，唔得就唔開，五月之後我去拍陳凱歌的《花影》。

林：《花影》係講D乜野？

張：講一個蘇州的大家族嘅醜聞，雙生雙旦，其他演員未搵到㗎。

林：喂！辣士里，聽話奧斯卡最佳外語片，你哋部個《霸王別姬》好大機會攞獎喎。

張：係呀。呢部片，乜都值番啦，得咁多獎，又話可以賺四千萬，乜都值番啦。
 

林：聽講係外國，要花好多時間搞活動宣傳至有機會得獎？

張：係呀，做了好多活動呀，今年我再參影，機會高好多，因為舊年我做了好多宣傳，有了知名度呀。冰姐，你有無見周星馳呀？

林：無噃。

張：佢點呀？講開又講啦，你好惜佢噃，成日掛往寫佢。老實講啦，拍《家有囍事》時，我呷醋㗎。

林：你使乜呷醋噃，我邊個紅星都一樣看待，鍾意睬我，我就寫佢，唔睬我嗰個，我唔會勉強。你鍾意我寫你，你咪睬我多D囉。唔好十問九唔應就得啦。

張：我鍾意睇你寫嘅嘢，我D朋友都鍾意睇你寫，叫做…叫做…

林：乜呀？忘記了點形容？

張：叫做歷歷在目呀。寫得好生動。

林：哦！你想講現場一樣係嘛？

《大富之家》拍到尋日，最後第二日，共有十場戲，要走四堂景，中間要等人，高志森叫我唔好走，陪吓辣士里傾偈，以上對話是分五次斷斷續續地完成的。

明報