1999

與哥哥首度合作音樂特輯 豆斗出動10萬私伙

1999-09-28

繼早排專程飛往巴黎取景後，昨日哥哥（張之暱稱）又再為這個特輯的香港部分開工。而這次香港部分合作的女主角，並非張柏芝，而是另一女角邱淑貞。

哥哥：「豆斗（邱之暱稱）同我入行咁多年，今次係第一次合作！」唔怪之得佢將呢個音樂特輯，稱之謂經典啦！而豆斗亦出動10萬元私伙衫協助拍攝。

昨日哥哥和豆斗終於正式為音樂特輯《左右情緣》開工。取景地點是中環的機鐵總站，拍攝內容是哥哥將要上機飛往巴黎，而豆斗送他往機鐵總站。

雖然豆斗已很久沒有拍戲，但昨日現場所見，導演一聲：「Action！」豆斗跟哥哥演起對手戲來，多個鏡頭都是一Take過搞掂，表現得非常自然。

問到豆斗對於這次拍音樂特輯緊唔緊張，她說：「面對鏡頭，我一啲都唔緊張，最緊張反而係我唔知幾時係正式拍攝日期。我今日呢場戲，哥哥都係前日先通知我。」

而當豆斗得悉通知後，即馬上搵老公沈嘉偉，出動到I.T.最大的形象指導為她襯衫。「哥哥話我喺呢個特輯裡面，會有二十場戲分，其中有十八場戲要著唔同嘅衫，我淨係揀衫都揀到頭痛！」豆斗笑說。照估計豆斗今次嘅服裝費都要成十萬大元。

哥哥說，這個音樂特輯絕對可稱之謂經典，皆因：「我同豆斗入行咁多年，今次係第一次合作！」至於搵豆斗做女主角的原因，乃是「投桃報李」這四個字！

爭取最好條件拍攝

「去年嘉偉（豆斗老公沈嘉偉）問我借「為你鍾情」餐廳向豆斗求婚。雖然呢件事唔係我嘅主意，但話晒我都有分策劃㗎！所以豆斗就要投桃報李，幫我拍囉！」

哥哥更表示，這是他自十年前，在無線拍《日落巴黎》後，再替無線拍的音樂特輯。而跟十多年前相比，這次哥哥更加親力親為。

「我今次向無線Fight（爭取）左好多好野 拍特輯，例如佢地畀左全無線最好嘅導演同攝影師我，又畀我用阿Zing化妝。我自己仲搵咗間車行，Sponsor（贊助）咗兩架車畀我拍呢個特輯，一架係今日呢特輯中畀豆斗開車，成二十二萬八千！另一部就係巴黎用嘅銀灰色跑車，不過我就唔知幾多錢。總之，呢個特輯將會好有電影感啦！」

香港報章