Leslie Cheung Cyberworld

哥哥生日與唐唐秘密遊日本

向來愛熱鬧的張國榮，今年生日竟破例玩低調，撇甩眾好友，與「密友」唐先生秘密遊日本慶祝。前晚當哥哥從日本返港，他一見記者，立即施展一招「調虎離山」，與唐唐前後腳出閘，更即場向記者表明立場：「我一個人返嚟！」

可惜哥哥百密一疏，唐唐在他出閘五分鐘後便緊隨其後，遂揭發不但同「機」返港，仲同「車」齊齊走。

剛度生辰的張國榮，並未在十二號「正日」當晚舉行派對，反而只與密友唐唐遊日本慶祝。雖然哥哥的「生日之旅」起行時未被揭發，但前晚返港的他，似乎對記者的恭候早有準備，甫出閘口即從側欄跨出，企圖掩人耳目。

哥哥甫見記者即問道：「你地係咪等阿菲？」頗為搞笑；問到他為何一人出閘時，哥哥即細聲地回答道：「我要開工，所以自己返嚟先，啲朋友喺日本留多幾日。（有冇順道掃貨？）冇呀，純粹休息。」

縱使哥哥聲稱獨自返港，但不及五分鐘，「密友」唐唐卻被發現原來緊隨其後，不過卻全程「頭耷耷」逃避鏡頭，其後更與友人愈行愈快，對記者的提問毫不理會，匆匆步向停車場。

相反稍微發胖的哥哥，則對眾人有問有答，提到其音樂特輯一事，亦爽快承認道：「係會去法國取景，下星期一去！」及後有記者誤問他今年何以不和媽媽（已逝世）過生日，哥哥神情一愕，在場記者立即打圓場，而哥哥亦匆匆登車離去。

不過，其後才發現此時趕上座駕的哥哥，原來並未離開機場，只是命司機在停車場徘徊，等候會合唐唐齊齊離去。