1999

唔爭做環球一哥 哥哥阿倫只打友誼波

張國榮昨日正式動筆簽約環球唱片，哥哥入環球，難免令人揣測他與譚詠麟會爭做環球一哥，但哥哥卻笑言不會與阿倫分大細，並強調兩人有交情，還經常打友誼波，談及與阿倫合唱時，哥哥卻表示交由唱片公司安排。

張國榮《1999 Hot Summer 環球唱片再會舊友》記者會，吸引了各地近百記者採訪，環球為隆重其事，專誠為哥哥設計了嶄新的電腦簽約儀式，更破天荒採用全球網上直播系統，務求令世界各地的「哥哥迷」，均可見證這歷史時刻。

除網上直播系統外，大會更請來呂方與李克勤當司儀，及特意複製了九十九張合約（哥哥所簽的迷你版），送給現場記者，難怪短短兩小時的簽約儀式，已花去六位數字的開支，氣勢不同凡響。   昨日心情極靚的張國榮，對於記者提問更無所不答，更首次大談與譚校長、陳小寶之間的交情。不過可能太興奮的關係，哥哥竟將「簽約環球唱片」錯講為「簽約娛樂唱片」，又將「與Alan久唔久都有打網球」講為「打羽毛球」，引得司儀與在場記者亦不禁大笑。   問到哥哥外傳五千萬過檔是否屬實時，他即巧妙地回答謂：「唔好成日問我值幾多錢咁俗氣啦！錢對我嘅刺激唔係咁大，不過以前果舊石（意指滾石）都出得起錢，依家成個環球喎，梗係唔會少啦！」

新碟九月推出

談及與譚詠麟合唱，哥哥即搞笑謂：「我諗合唔合唱都要講交情嘅，我同阿倫呢幾年都有打吓網球，依家同公司，合唱就絕對有可能！諗諗吓佢話約四大天王食飯，講咗咁耐都未食，我懷疑佢人面唔夠廣，人地夾埋唔『騷』佢！（咁你覺唔覺自己會係環球一哥？）一哥呢啲野，我一直都唔鍾意分，就算公司斟水個阿姐，我都樂意同佢做好朋友！」  

香港報章

哥哥加盟環球不在乎一哥名分

昨日是巨星張國榮加盟環球的大日子，唱片公司花六位數字假會展新翼舉行盛大記者會，簽約儀式在互聯網上直播，會場設有四人管弦樂隊現場拉奏哥哥首本名曲，還請來呂方和李克勤做司儀，無線、港台、商台和新城四大傳媒高層俾面到賀，近百東南亞傳媒出席採訪。環球歌手均送花籃致賀，而譚詠麟所送花籃寫上「勇闖高峰」賀詞。

哥哥神采飛揚宣布，他的製作公司Apex於個多月前正式成立，以後他的唱片都是自己公司製作，交給環球發行，簽約兩年，一年出一張唱片。  

記：傳聞你三千萬簽環球喎？

張：唔好成日講錢，咁俗！（環球高層陳小寶插嘴說：「今時今日俾到錢簽張國榮公司好多，但我有誠意。」）

張：（開玩笑）即係話我平，其實上一間公司（滾石）都好好，但音樂過幾年要有新刺激，既然一舊石（滾石）都俾到錢，唔通環球俾唔到咩，唔可以話俾唔到錢我咁Cheap。

記：當年你同阿倫係死對頭，但今日同一公司，有乜感覺？

互相尊重

張：呢只係歌迷同歌迷之間問題，依家Fans都結晒婚啦，唔會好似以前咁。我同阿倫私下係朋友，雖然唔係黐頭芒，但大家都尊重大家，傾到偈，呢兩年都有打網球，所以交情幾好，但大家蒲點唔同，有地方唔會一齊去。

記：所謂一山不能藏二虎，邊個做一哥？

張：我從來唔分呢，入得呢間公司，送信個都會對佢好，冇話邊個head我或我head邊個，就算斟茶遞水阿嬸都可以做朋友，咁大間公司，梗有好多出色藝人。

記：咁你係咪會同譚詠麟合唱呢？

張：同一間公司，可能性係會有，同一個人合唱一定要有交情，我同阿倫有交情，所以唔排除合唱，但未係計畫中，最緊要係有大家Style。

太陽報

綜合報導