Leslie Cheung Cyberworld

徐楓赴意大利賣《霸王別姬》

《霸王別姬》可以重見天日，對徐楓有著相當重大的意義。汪汪尋日搵佢問清楚《霸》片重映嘅事，徐楓證實：九月四日在北京再上映，然後再遍佈去全中國。到日前為止，大陸話禁《霸王別姬》，但上海就不停咁放映，直到目前為止，已經收咗六百幾萬人民幣。

徐楓話：「汪汪，我同你計吓條數，上海市嘅票房，等如全中國的廿六分之一，用六百來乘廿六，就係一億五千幾萬囉！換言之，《霸王別姬》在大陸可以收成億幾人民幣，因此呢部片係唔係禁映，對我幾重要。」

而家《霸》片改咗兩個字，可以重新上映，徐楓身為湯臣公司的老闆，佢又可以分番幾多呢？她說：「大陸分番百分之十左右啦，即係全國上映一億五千萬，我收番一千五百萬左右啦」「咁咪幾好！」「梗係好過無啦！」

「其實真係想問吓，條數點計出嚟嘅！」「嗱！我哋部片交俾北影傾發行，因此影片上咗幾多，發行同北影一人佔咗一半，而北影分咗一半，又會以小比例嚟分俾湯臣公司啦！」

「個比例點少法？」「唔方便講，總之因為萬事起頭難，大陸發行唔算健全，而且每個市、每個省嘅發行方式唔同，暫時製作公司係分少啲，將來再爭取多啲。」