1993
徐楓上台領獎表現非常冷靜
十七號出發去康城影展，唔經唔覺已去了十日，本來仲要去巴黎玩兩日，都係覺得告假太耐，因此心思思先行返港。
今次《霸王別姬》獲得康城影展金棕櫚獎，汪汪可以說是去得合時，起廿四號頒獎禮嘅下午，大家嘅心情，幾咁緊張。
一直等到下午一點幾，仲未有任何消息，令到徐楓心急如焚，後來一時四十五分，先至接到通知，問徐楓、陳凱歌、張國榮來唔來康城，又叫佢哋務必出席，而在言詞之間，只係暗示佢哋可以攞三個大獎其中一個，但係攞金棕櫚獎抑或評審特別大獎，抑或最佳導演，真係無人知。
因此到咗頒獎禮晚上，要到七點半鐘，先至陸續頒佈有乜大獎，而康城影展好奇怪，第一個獎就頒俾最佳男主角，而由NAKED的男主角大衛戴偉思獲得，張國榮入座未幾，其男主角嘅夢已落空。
不過Leslie一直都表示良好的風度，到咗八點幾，評審團主席路易馬盧宣佈，今年最特別係有兩部片獲金棕櫚獎，其中一部就係《霸王別姬》，張國榮與徐楓陪陳凱歌上台領獎。
汪汪在台下，都唔知幾激動，仲以為徐楓一定會喊，點知佢就唔喊喎，而且表現得非常之冷靜。
佢哋領咗獎之後，忙到頭暈，來自世界各地的傳媒包括記者、電視台，都輪住訪問拍照，Leslie今次由巴黎再番康城出席頒獎禮，都可以話決定英明，事實上由美聯社、法新社發出嘅頒獎照片，發到全世界，呢個係作為一個電影人之中最重要嘅時刻。
今年，台灣報界派咗十三個記者飛去康城，為咗等候得獎名單，報社仲等到凌晨兩時才落版，可以說是魄力驚人，比起上來，香港方面陣容就輸蝕好多。
香港報章
LeslieCheungCyberworld © 2024 , All Rights Reserved