1996
榮少扮女人更勝女人
1996-12-24
文：阿吉
演唱完之後，張國榮好鍾意問人：「你最鍾意邊隻歌呀？」
佢嘅朋友們都非常合作。一一作答。
張國榮問阿吉最鍾意邊隻歌時，阿吉唔願意回答，只係話：「隻隻都鍾意。」在場嘅朋友鬧：「講嘢咁行貨嘅？！」
「隻隻歌都只差一分兩分，使唔使計得咁準確找出答案呀？」阿吉咁話。
其實阿吉最鍾意《紅》，鍾意哥哥著紅色高踭鞋唱《紅》嗰場。哥哥扮起女人來，比女人還女人，又嗲又姣腰枝又軟，跳舞的舞姿好迷人，講起哥哥嗰雙紅色高踭鞋，張敏儀都話好鍾意，敏儀問起哥哥雙高踭鞋，哥哥忍唔住望吓敏儀雙腳：「你著幾號鞋呀？」「四號半。」但哥哥嗰雙紅色高踭鞋對於敏儀大姐來講，真係大到「船」一樣，唱完送俾佢都只能作展覽品。
「呢對紅鞋做的嗎？」「係呀。」
哥哥有一套西裝，西裝上釘有七萬幾顆鑽石(其實係水晶)，釘工都八萬幾，衣服重達數十磅，「叔平設計嘅，我都唔知佢好在那裡，但，襯起上來又幾好睇。」哥哥咁話。
香港唱完，張國榮稍作休息就會到世界各地（包括中國)作巡迴表演，唱到九七年九月，可能超過一百場。哥哥話：「年初一都無得抖。」
明報
LeslieCheungCyberworld © 2024 , All Rights Reserved