張國榮點可成金 拍邊個紅邊個
2002-03-21
張國榮的新作《異度空間》雖然在今個月廿八日才正式上畫，但面對其餘兩部同在復活節檔上映的《戀愛行星》及《藍血人》，有否信心成為最受歡迎的一部？哥哥坦言在香港能否大收，仍是未知數，不但自己難以估計，相信誰也難以觸摸到邊個是票房的保證，不過在香港以外的東南亞市場，卻敢言一句：「香港我唔知，但我個名亞洲，我有信心會贏晒！」
哥哥為《異度空間》一片的宣傳，與過往所拍的電影相比，確實異常落力，發起日本Fans組團來港睇《異》片首映之餘，並將日本團來港所得的部分收益撥作電影宣傳之用，認真出錢出力。
哥哥用心良苦的說：「老實講，依家個電影市道根本就唔穩陣，我今次咁落力，都係想令更多觀眾留意到呢套戲，希望帶番多人入場睇戲，搞番旺個市。」
接拍《異》片原因兩個
不只在宣傳上出一分力，哥哥連指導新人都同樣不遺餘力，《異》片中的林嘉欣當然獲益良多。哥哥今次接拍羅志良執導的《異》片有兩個原因，一是初拍驚慄戲種，其次是與新人林嘉欣合作，會有新鮮感。面對一班新人，自然希望能擦出新火花，作為前輩的哥哥很欣慰的說：「我覺得自己係一個福將，邊個同親我合作新人都會Hit，而一班新人都好尊重我意見，聽我講，由袁詠儀開始，到舒淇、莫文蔚、常盤貴子，甚至林嘉欣。有邊個最唔聽話？無啦，自然會人間蒸發，呢一行有句話係：日久見人心。」
林嘉欣講對白一舊舊
對於首次拍檔的林嘉欣，哥哥讚不絕口：「佢好聰明，好有語言天分，好醒目，唯一缺點係一心急就會將對白講到一舊舊。所以我其中一場戲，叫導演唔好開機，清晒場，間房度我帶住佢不停練對白，結果調佢一個鐘頭後，佢一Take就拍好先前要拍場戲，好叻女。」
時下的新人之中，哥哥心中有數，肯定在圈中能成為接班人的只有三個，張栢芝、謝霆鋒，還有林嘉欣。哥哥情有獨鍾的說：「我永遠都係鍾意栢芝同霆鋒，依家就多個林嘉欣，香港觀眾最鍾意睇就係靚仔靚女識做戲，佢有貌有才有實力，我睇好佢。
哥哥爆日本奸商斂財 萬三港幣睇首映
張國榮果然一呼百應，一發起日本Fans組團來港睇《異度空間》首映，即引起來自東南亞各地的Fans爭相來港，希望與偶像一聚，可是在這次難得的聚會中，卻有人趁火打劫，想藉歌迷見偶像心切，乘機「發財」。繼早前出現首映禮假飛後，哥哥昨日更揭發日本也有不良奸商，竟然以每位萬三元港紙價套餐，訛稱可以參加哥哥廿三號的首映活動，睇戲及影迷聚會外，還可每人點哥哥唱兩首歌，欺騙一班熱情的Fans。哥哥得知這無良之徒的惡行後，馬上電郵日本方面的朋友，代作澄清，以免Fans受騙。
哥哥心痛的說：「班Fans俾人欺騙，真係好難過，萬幾二萬銀去睇個張國榮首映？真係好陰功，好震驚。其實我自從八九年退休後，國際Fan Club已經解散，但佢真係好有心，一有我Event就一齊參與，佢支持，我好感激。」
東方日報
LeslieCheungCyberworld © 2014 , All Rights Reserved