張國榮自揭將女歌迷窒走內情
1988-08-31
張國榮做完他的廿三場個唱後，即往泰國還神，繼而往歐洲旅行散心，回來再往澳門開演唱會。
演唱會最後一晚，亦有甚多圈中好友上台助陣，而且還是歌壇的大哥大、大姐大為他作壓軸表演嘉賓，這個場面，可真的不是人人有，也非每一位歌星都可以有的啊！
 |
「成個騷做完了，有乜感覺？」 「鬆一口氣咁囉，亦好似坐完監，放出來咁款！」
「睇落，你直情做到好開心，唔捨得俾個騷停咁款，為乜唔再繼續呢？」「你估玩玩吓咩，唱廿三場，血汗出唔少，而且，個場亦到期要交番出來，就算我想，亦唔可能再唱。」
「對呀，聽聞你有一場，對一個走上台的女歌迷，好唔俾面，窒到個女仔好無癮咁走落台去，你唔怕得失一個歌迷，俾人地覺得你囂張，因為咁而失去其他歌迷咩？」「咁就要說明我為乜事要窒呢個女仔先，唔好當定我不對先。」
原來，張國榮是受不了那位女歌迷太過核突的動作，才迫使他作出這個決定。 |
「那個女仔，已經上過一次台，但第二次再走上台送花俾我，無所謂，佢要錫我塊面，可以。但係，你知唔知佢要乜？ 佢伸條脷出來，叫我錫佢，你話啦，咁核突，點得先。我乜都無做，就問佢係咪想連我條命都要埋，咁窒法，都已經係好普通，同埋好俾面佢添啦。」
「唱完廿三場，係咪仲有些唔捨得？」「有些啦，正所謂，唔唱都唱咗廿三場，同大家玩咗廿幾日，點講都有些唔捨得，之不過，回心諗吓，亦唔可能唱一世，總有落台一日，所以，諗落自己好儍，無可能咁諗嘢。」
有自信的人才會自嘲，張國榮是一個有腦兼有信心的人，要不然，他也不會在年前在英國以四十萬英鎊買了一層洋房，九月則去英國收樓，另外，他還約了林子祥在英國會合，到時他還會介紹林子祥買樓保值。
「好多圈中人都在美、加買樓做移民，為乜你反而揀英國？」「英國買樓，保值過美加，因為去美加的移民一到，樓反而會起多咗，一多，無乜人吼自己那間，有價無市，等於一個零字，倒不如在英國買更好，至少，有穩陣兩個字先，而且，我又唔係為了移民至買樓，所以，無必要好似其他人咁要揀美加樓至買呀，係咪？」
張國榮向來無生意頭腦，不喜把錢做生意，索性用來買樓保值，他認為在英國置業每年都可增值，是一種最保險的投資。
